Ка хэмээгч түрэг яруу найрагч олон жил Германд улс төрийн шалтгаанаар амьдарсны эцэст төрөлх нутаг Туркийн зах хязгаарын Карс хэмээх буйдхан хотод эргэж ирнэ. Шашны тэмцлийнхээ төлөө хижаабаа тайлж хаяхаас татгалзан амиа хорлож буй охидын талаар сурвалжлах гэж ирсэн ч гэлээ цаад нарийн учир шалтгаан нь урьдын хайр сэтгэлт Ипек хэмээх үзэсгэлэнт бүсгүй нөхрөөсөө салсныг дам сонссоны учир сэтгэлийнхээ буйдхан бодолдоо горьдлого тээн ирсэн нь энэ ажээ. Ирсэн өдрөөсөө л амиа хорлосон охидын ар гэрийнхнээс ярилцлага авах, хотын жижигхэн сонины газрын эрхлэгчтэй уулзах гэх мэтээс ажил нь эхлэх боловч боловсролын их сургуулийн захирал алагдахад гэрч болж таарснаар тэрээр Карсын улстөр, шашин, ислам, үндсэрхэг курдуудын дунд өрнөх толгой эргэм учир зангилааны ээдрээнд эрхгүй татагдан орохын хажуугаар Ипектэй өрнөх хайр сэтгэл нь гүнзгийрэн хамтдаа Франкфурт руу буцах хэмжээнд хүртэл яригддаг. Түүнийг байх хэдхэн хоногийн хугацаанд цас үлэмж ихээр орон хотын гадаад ертөнцтэй холбогдох гол замууд боогдон, үүнийг далимдуулан улстөрийн үзэлт дээхнэ үеийн алдарт жүжигчин Сунай театрын жүжигчилсэн тоглолтын үеэр хотын цэрэг, тагнуулыхныг хамарсан жижигхэн бослого үймээн дэгдээж хотын хяналтыг авч таарна. Ка энэ зуур улс даяар онц ноцтой алан хядагч хэмээн эрэн сурвалжлагдаж буй Хөх хэмээх ислам үзэлт эртэй хэд хэд нууцаар уулзах бөгөөд Хөх түүний сэтгэлт бүсгүй Ипекийн дүү Кадифтай нууц амрагууд болох нь мэдэгдсэнээр Кагийн Карст өнгөрүүлсэн хэдхэн хоногийг улам л ээдрээтэй болгож орхино. Ка Ипектэй цуг Франкфурт руу буцаж очин жаргалтай амьдарч чадах болов уу, үгүй юу гэдэг асуултыг уншигч танд үлдээе.
Энэхүү романы төгсгөл үе рүү Орхан Бэй хэмээгч зохиолч Ка найзынхаа Карсад байх үед бичсэн шүлгүүдийг нь олж авахын төлөө эрэл хайгуул хийж байгаа дурсамж маягаар өндөрлөх болно. Орхан Бэйг харин зохиолч Орхан Памуктай андуурч болохгүй шүү. Учир нь Орхан Бэй ч тэр, Ка ч тэр уран зохиолын хийсвэр дүрүүд.
Номыг уншихад хүндрэлтэй байсан нэг зүйл нь А5 хуудсан дээр шигүү өрсөн маш жижигхэн шрифт. Миний хараа -0.1-р нэмж муудсан байх аа гэж бодож байна. Бас би бээр улстөр, шашны ойлголтын талаар маруухан нэгэн боловч барьж, тавин, барьж тавьсаар нэг юм дуусгаж орхилоо.
Сайн тал нь Туркийн улстөр, шашин, үндэстэн хоорондын сөргөлдөөн, Герман руу дүрвэгч түрэг хүмүүсийн талаар тодорхой мэдээлэлтэй болж авлаа.
No comments:
Post a Comment