Бүрхүүлд орсон хот

Стивен Кинг. Энэ нэрийг мэдэхгүй ном, кинонд дурлагч байхгүй биз ээ. "Бүрхүүлд орсон хот" зохиол дээр гардагчлан жижиг хотын дээгүүр юуг ч үл нэвтрүүлэх /агаар болон ус бага зэрэг нэвчиж ордог/, тэр дундаа хүн, онгоц, машин техник, сум, пуужин зэрэг ч нэвтэлж чадахааргүй ямар нэгэн нүдэнд үл харагдах тунгалаг бүрхүүл тогтвол тухайн хотод юу болохыг таамаглаж байна уу? Мөн хотын удирдагч гэж өөрийгөө бодчихсон дарангуйлагч болон түүний харгис хүү, тэдний доор ажиллах, сүүлд бүрхүүл тогтсоноос хойш цагдаа болсон хотын танхайчууд байхад шударга үнэн, сайн сайхны төлөө тэмцэх хотын иргэдэд юу тохиолдож болохыг энэхүү зохиол дээр тодорхой харуулжээ. Аймшиг гэхээс илүү зөгнөлт зохиол гэж би дүгнэнэ. Мэдээж бүрхүүл анх тогтох үед болсон санамсаргүй үхлүүд болон хэрцгийгээр алагдсан хүмүүсийн цогцсууд нэгэн байшингийн зооринд ялзарч байгааг тооцохгүй бол шүү дээ. Нийгмээс тусгаарлагдсан, гаднаас огтхон ч үл нөлөөлөх засаг захиргаа, цэрэг арми, хуульгүй үед хүмүүс хэрхэн дураараа авирлаж, өөрийгөө хаан гэж бодох үед гэм зэмгүй, цэгц шударга хүмүүс хэрхэн хохирч байгааг энэхүү зохиолын 1-р ботид дүрсэлжээ. Цаашлаад тайлагдахгүй байгаа олон нууцууд, тэр дундаа бүрхүүл яагаад тогтсон болон дарангуйлагч, зохиолын гол баатар хоёрын хэний ялалтаар төгсөх нь 2-р ботид дурдагдана гэж бодож байна. Стивен Кингийн зохиолууд дээр ихэвчлэн хүний дотоод ертөнцийн муу муухайг дэлгэн харуулж, орвонгоор нь эргүүлж харуулдагт л учир нь буй. Түүний хэлсэнчлэн "Мангас, буг чөтгөрүүд бодитоор оршдог, тэд бидний дотор байдаг. Зарим тохиолдолд тэд ялдаг" гэсэн нь бодит үнэн юм.